марий калык

Сай илет, кутырет, марий калык?

Сай илет, кутырет, марий калык?
Да перкан мо киндет, кочкышет?
Улат патыр, Онар гаяк тале?
Шоҥгыеҥым жапла мо шочшет?

Ожсо семын шуктет мер йӱлатым?
Да поян вургемет ош тӱсан?
Тудо тӱр дене мучко тӱрлалтын?
Кумалат мо тыгак пӱртӱслан?

Кожлаштет тугак шуко мо янлык?
Да шудаҥ ужарга олыкет?
Ырыкта шӱм-чонетым поянлык?
Ий гыч ийыш тӱла вольыкет?

Родо гай пагалет пошкудетым?
Курым наре кужу ӱмырет?
Пагалет шем мончам, ош кудетым?
Мурен эплын, шоктет шӱвырет?

Аралет мо шочмо йылметым?
Тукымет марий мутым акла?
Пайремлет веселан пайреметым?
Акылет кочо вӱд деч сакла?

Сай илет, кутырет, марий калык?..
Мыняр йодыш, ужат, погынен.
Чыла тидым, айста, ваш ушналын,
Колтена паша ден волгалтен…

© Виталий Дмитриев-Ози