марий ушем

Ик шӱлыш дене тарваныме пагыт!

«Марий ушемын» вуйлатышыже Игорь Кудрявцевын шонымашыже.

Пагалыме мари-влак!

Арня ончыч Владимир Козлов ала-кушан кычал мумо видеосъёмкым мыланна ончыктыш. Вара ты сюжетым «Лайд Козлов ВКонтакте» шке интернет-страницышкыже луктын. Очыни, шагалын ты видеосӱретым ужын улыт. Пеш ондакысе. Икымше пӱсӧ ой, кудо вуйышкем пурыш: мо тиде? Ончалза!

https://ok.ru/video/898827739

Мландым да кавам сургалтарен!

Уло ялге пайрем вургемым чиен, куанлын вашталтын, уремыш лекше калык. Кажнын шинчаштыже илаш кумыл улмо шижалтеш. Чыланат тыглай кушталтат да веселитлат веле огыл — нуно сӱан йӱлам шуктат, пайремым эртарат. Нунын уло-укештат, чыла шижмашыштат кӱшнӧ, пыл помыжышто. Пӱрен куштымашышт дене пуйто мландывалне ийыт да пӧрдыт. Тыглай огыл, а куштылгын, волгыдын, пӱртӱсын шочшышт семын пуйто чоҥешташ ямде улыт.

Кугезе тукым деч аралалт кодшо калык искусствым юзо пӱртӱсын йодмыжо гоч ончыктат да шуктат. Кажне тарванылме татышт, йолыштын ма але шӱргӧ тӱсыштын, ончылгоч ямдылыме сценарий почеш огыл, а курым тукымвож гыч толшо, аралалтше, илышыш пурталтше улеш. Ӱдырамаш-влакын моткоч лывырге капышт ден кидышт, сӧралын да изиш чояракын модмыла шыргыжал колтымышт, пӧръеҥ-шамычын виян тавалтымышт ӧрыктарен, шӱлышым налеш. Уло сандалык шке таҥастараш лийдыме сӧраллыкше да марий семын ковыран, сымыстарен йоҥгымыжо, сӱан тургымым мондаш лийдымыш савыра.

Пуйто ӱлыл да кӱшыл кок тӱтыра коклаште

Ончалза оръеҥым – марлан кайыше ӱдырым! Могай тудо пиалан! Тыгай пайрем тудлан икымше, нигунам лийдыме, лач тиде ӱдырын чон чияжым тӱжваке лукшо пайрем. А кидше-кидше — чылт кӧгӧрчен шулдыр!

Изи ньогам ты илыше радынашке ешарымаш сӱретым эшеат сӧрастара. Пуйто чылажат тыглай веле: гармонь да шӱвыр. Симфоний тӱрыс огыл, а диссонанс семын тышеч-тушеч йоҥга. Но ялысе гармонист-влак тугай савыртышым шке семыштышт кучылтыт — шинчен-шоген от сеҥе. Вет тиде пырля кучылтмо ритм гоч шке шотан трансыш пуралтеш. Уло капкыллан волгалтше эрыкан тарванылмаш. Тыге самырык ешын шочмо татлан чыланат сайлыкым, тичмаш пиалым тыланат. Тыгай йодмашым Тӱня шижеш, колеш, шке юзо вийже дене левед арала.

Пагалымаш дене «Марий ушемын» вуйлатышыже Кудрявцев И.М.