Марий Ушем газет

«Марий ушем» ик еш гай чумыргаш ӱжеш

Пагалыме йолташ-влак! Шергакан таҥ-влак!

2020 ий 8 декабрьыште «Марий ушем» лӱман газет ош тӱням ужо. Тиде – Марий тиште кече вашеш марий-влаклан сай пӧлек лие.
Лудшына-влаклан «Марий ушем» («Союз мари») Регионысо марий мер организаций вуйверын вуйлатышыже Игорь Кудрявцевын ончылмутшым да пӱтынь газетын PDF файлжым темлена. Чылаштлан оҥай лиеш манын ӱшанена:

«Ятыр ий годым «Марий чаҥ» газет савыкталтын огыл. Таче ме 1990 ийыште шочшо «Марий чаҥнам» угыч у тӱсаным луктына. Да тудын лӱмжымат вашталташ мутланен келшен улына. Ынде тудо «Марий ушем» лӱм дене лектеш. Тиде тӱҥалтыш веле. Ме ӱшанена да ӱшандарена: ончыкыжым тудо савыкталтше СМИ коклаште шке пеҥгыде вержым налеш, тушто Марий кундемнан, тыгак тӱня мучко шарлен илыше марий калыкнан тачысе да ончыкылык илышыж дене кылдалтше ятыр йодыш пӱсын тарвана.

Тыгодымак ик эн тӱҥ йодыш марий калыкын илышыжлан ойыралтеш. «Марий ушем» газетна гоч ме калыкын тӱргоч ташлыше проблемыже-влак нерген каласкалаш палемденна. Мемнан корреспондентна ден журналистна-влак обществыште власть структур-влакын ыштылме йоҥылышыжо-влакым, ӧрдыжлу гай лектын шогышо ситыдымаш-влакым келгын почын ончыкташ тӱҥалыт. Тыгодымак властьлан нине ситыдымаш-влакым кузе кораҥдаш лийме корным ончыктена да обществылан, калыклан умылтарена.

Ме шкенан статьялаштына, публикацийлаштына илыш шотнам да ратнам нимогай сӧрастарымаш, утыждене моктанымаш деч посна, чын иктешлымашлан эҥертен, илышын тӱрлӧ тӧрсыржым, нелылыкшым чараҥдаш да тидым калык деке шукташ тӱҥалына. Чара критиковатлыш мемнан нимогай кумылна уке, но тыгодымак умшам петырен кошташат сита манын шонена. «Марий ушем» газетна эрыкан да калыкын вучен да йӧратен лудмо газетше лиеш манын ӱшанена. Тудо мер тӱсан лийшаш да калык деке мелын шогымыжым, тудын дене пырля улмыжым тӱрыс почын пуышаш. Ме умылена, электрон увер (информаций) саманыште Интернет газетым ӧрдыжкӧ шӱка, корныжым шыгыремда. Туге гынат калык коклаште газетын рольжо нимынярат иземын огыл.

Пӱртӱс, экологий, марий йӱла, ял калыкын илыш ойыртемже, экономике, оласе тӧрсыр, демографий да социал проблеме-влак, мер политик илыш, кадрым куштымо, лудшылан оҥай да пайдале ятыр моло тӱрлӧ йодышымат ме родына-влак деке яндар чурий, эрыкан шонымаш дене намиен шуктена. Тек мемнан марий газетна илышнам тӱзаташ полша, моло калык дене тӧр лияш тарата да ӱжын шога.

Санденак ме чыландамат – лӱмлӧ журналистшымат, илышым умылен ончышо тыглай еҥ-влакымат – мемнан дене пырля лияш да сомылнам ворандарен колташ полшаш ӱжына. Газетнан икымше у номерже 998 экземпляр дене савыкталтеш. Ту­дын содержанийже, кугытшо да тиражше ончыкшым могайрак лиеш – тидым илыш ончыкта. Газетна поро кумылан еҥ-влакын надырышт кӱшеш лекташ тӱҥалеш да мемнан чолгаеҥна-влакын полшымышт дене кундемна мучко шарла.

Айста «Марий ушем» газетлан кужу ӱмырым да кугу лектышан ончыкылыкым тыланена, ик ой дене пырляшке ушнена».

Марий Ушем — 1-ше номер.pdf