Пагалыме марий Айдеме!
2024 ий 8 декабрьыште «Марий Сийгудо» полатыште марий мер пашаеҥ-влак «Марий ушем» дене пырля Поэт Валентин Колумбым шарныме кечым эртарена. Тыгак В. Колумбын шочмыжлан 90 ий темме юбилейлан ямдылалтме планым пеҥгыдемдена.
Погынымаш 10.30 шагатлан тӱҥалеш.
Адрес – Подольск курсант-влак урем, 5.
ПРОГРАММЫШТЕ:
1. Валентин Колумбын илыш корныжо да творчествыж нерген видеопрезентаций, кӱчыкын палдарымаш.
2. Почеламут да муро-влак йоҥгалтыт (йоча да кугурак-влак лудыт).
3. Шарнымаш, Поэтын илыш корныж гыч да усталыкше гыч палыдыме тат-влак.
4. В. Колумбын поэзийжын философийже.
5. Погынышо-влакын 90 ияш лӱмгечым вашлийме да эртарыме шотышто ой-каҥашышт:
- газет, журнал, Интернет да савыктыш гоч палдарыме шотышто;
- В. Колумбын поэзийже негызеш у мурым, сӱретым возымо да видеоклип-влакым ыштыме шотышто;
- В. Колумбын творчествыжым тӱрлӧ кундемысе марий школлаште, тӱвыра ушемлаште кумдан палдарыме да тушто мероприятий-влакым эртарыме шотышто;
- В. Колумбын руш, одо, эрзя, татар, чуваш, хакас да моло поэт-влак дене кылже шотышто (вашла кусарымаш, серыш, вашлиймаш…) келгын шымлымаш;
- 90 ияш лӱмгечым могай формат дене, кузе да кушто эртарыме шотышто темлымаш-влак да молат.
6. Лектыш:
- вашлиймашын пунчалже-влакым пеҥгыдемдымаш;
- вашлиймашын темлымыжым СМИ-лаште кумдан шарена да марий-влакым тиде сомылыш ушнаш кумылаҥдена, ой-каҥаш дене да практически полшаш тӱҥалына:
- тиде пунчал денак Марий Эл Республикысе тӱвыра, печать да калык-влак кокла-се кыл шотышто министерствыш, РМЭ виктерыш, Россий тӱвыра министерствыш, Россий Писатель ушемыш темлымаш да йодмаш дене лектына.
7. Вашлиймашке лӱмлӧ еҥ-влакым да кугыжаныш пашаеҥ-влакым ӱжынна (кӧ толеш, ончылгоч каласаш неле):
- кугыжаныш пашаеҥ-влак;
- палыме композитор-влакым;
- художник-влакым, вузласе шанчызе-влакым.
Пагален,
«Марий ушем» вуйвер вуйлатыше,
«Ару Элнет» тоштер-комплекс вуйлатыше
Лайд Шемйэр (В. Козлов)
Фото — «Ару Элнетын» архивше гыч.