Онавуй деч У ий саламлымаш

Кумда Россий кумдыкышто илыше марий-влак!
Пӱтынь Российысе «Марий ушем» мер толкын лӱм дене чыландамат У ий дене саламлем!

Марий тӱнясе мер илышын 2022 ийыште кузе эртымыжым ончалаш гын, тидын шотышто Марий Элысе, Сургут кундемысе, Татарстанысе да Удмуртийысе «Марий ушем» мер организаций-влакын шинчалан перныше сомылыштым сай могыр гыч палемден кодена. Нуно марий чапым кӱшнӧ кучашлан шке вийыштым да жапыштым чаманыде тыршеныт. Сандене нунын пашалектышыштат тӱвыргӧ..

Илышнан тачысе куштылго огыл саманыштыжат, чыла тӱрлӧ ситыдымашым сеҥен лектын, волгыдо корныш вончаш ӱжам. Сай могырыш вашталтыш мемнан шкенан дечат кугун шога. Ятыр поро шомакым каласена «Марий ушемын» 2022 ийысе сай пашаже нерген. Тыгодымак палемдена – ыштышаш сомылнаже эшеат шукырак. Тиде – марий калыкын чотшым аралаш, яллаште илыш йӧн сайрак лийже, илыш куштылемже да пашавер лийже манын, ме правительстве ончылнат йодын моштышаш да ты сомылым илышыш пуртен кертше лийшаш улына. Тидлан уш-акылнат, вий-куатнат сита.

Сандене марий илышнам тӱзатымаште У ийыште вий-куатнам чаманыде, моштымашнам да чолгалыкнам иктыш ушен, вуйым нӧлталын, ончыко гына кайышаш улына. А тидлан Виче велнат, Урал могырнат, моло кундемлаштат «Марий ушем»-влакым почаш да нунын пашаштым сайын виктарен, ончыко каяш ӱжам.

Тек У ий мыланна вий-куатым, нелылыкым да чаракым сеҥымаште пеҥгыде ӱшаным ешарен шога да волгыдо ончыкылыкыш виктара.

Эше ик гана У ий пайрем дене!
Таза да пиалан лийына!

Кугу пагалымаш дене,
Пӱтынь Российысе «Марий ушем» мер толкын вуйлатыше,
Онавуй А.И.Радыгин

Фотом MariUver сайт да «Ару Элнетын» фондшо гыч налме.